Në konferencë të fundvitit, shefi i Grupit Parlamentar të AAK-së, Besnik Tahiri ka thënë se nuk po mund të gjejë ndonjë element që duhet përmendur si gjë pozitive që ka ndodhë në këtë qeverisje.
Tahiri ka përmendur disa pika që sipas tij i kanë dhënë hije të zezë vendit.
“1) Rezultati i PISA-s ka qenë më i ulëti që Kosova ka mundur ta marrë. 2) Për tri vite resht pesë herë e kanë pasur në agjendën legjislative rritjen e pagave. Kosova ballafaqohet me sistemin me të ulët të pagave në rajonin e Ballkanit Perëndimor. 3) Rritja e çmimit të energjisë duhet të adresohet urgjent tek Prokuroria e Shtetit, pasi për një numër të njerëzve është e papërballueshme kjo ngritje. 4) Siguria e vendit. 5) Luftimi i sistemit te gjyqësorit që Qeveria i bën. 6) Politika e jashtme. Kosova ka dështuar duke qenë vend i sanksionuar dhe që nuk ka marrë asnjë njohje të vetme gjatë kësaj qeverisje. 7) Zhvillimi ekonomik – për dy vite mbi 1 miliard euro nuk janë investuar në Kosovë, të cilat janë paraparë për investime kapitale. 8) Maja e dështimit të kësaj Qeverie është draftstatuti i Asociacionit i cili është prezantuar”, ka theksuar Tahiri.
