Ministria ruse e Mbrojtjes njoftoi sot se Ukraina hodhi tre raketa amerikane të tipit “HARM” në rajonin rus të Belgorodit. “Tre HARM ukrainase, të prodhuara në Amerikë, u shkatërruan mbi territorin e Belgorodit me ndihmën e mbrojtjes sonë ajrore”, njoftoi Ministria e Mbrojtjes, raportoi Tass.
Tentativa për sulm ukrainas, siç u tha, u zmbraps rreth orës 15.00 me orën lokale. Guvernatori i Belgorodit, Vyacheslav Gladkov, tha sot se 20 shtëpi janë dëmtuar nga bombardimet e zonës.
“Trupat ukrainase bombarduan fshatin Urazovo me një raketë-hedhës me shumë tyta ‘grad’. Sipas rezultateve të para, askush nuk është lënduar, por janë dëmtuar 20 shtëpi, tha Gladkov në Telegram.
Nga ana tjetër, ushtria ukrainase njoftoi se Rusia shënjestroi Ukrainën me 158 dronë dhe raketa gjatë natës, duke goditur infrastrukturën kryesore, objektet industriale dhe ushtarake.
