Kryetari i Aleancës për Ardhmërinë e Kosovës (AAK), Ramush Haradinaj, ka akuzuar kryeministrin Albin Kurti se nuk po i trajton me dinjitet veteranët e luftës çlirimtare. Ai tha se mos të ishin luftëtarët e lirisë, veteranët e luftës, Kosova nuk do të ishte e lirë.
Këto deklarata, kryetari i AAK-së dhe ish-komandanti i Zonës së Dukagjinit në UÇK-së, Haradinaj i bërë pas vizitës që i bëri kategorive të dala nga lufta në Ditës së Veteranit, që shënohet më 30 dhjetor.
Haradinaj tha se kryeministri po i nëpërkëmbë vlerat e luftës, duke i dashur më shumë vlerat e të tjerëve.
“Kryetari i qeverisë është më i dashur me vlerta e të tjerëve se me vlerat e veta, me vlerat e lirisë së vet, me UÇK-në, me ushtrinë e vet me policinë e vet…në secilën situatë ai gjen arsyeje me i poshtëruar, me i nëpërkëmbë”, tha Haradinaj.
Në Kosovë, sipas tij, kanë ndodhur shumë padrejtësi pas luftës.
“Një nga padrejtësitë është edhe lakmia, apo marrja me emrin e veteranit. Iu siguroj se nuk do të ishim në liri, do të ishim nën njerëzit e Arkanit, pa veteranët pa ata që kanë luftuar. Edhe liria jonë nuk është e sigurt nëse ne nuk i vlerësojmë dhe nderojmë vlerat e lirisë”, ka thënë Haradinaj.
