Partia e Socialistëve Evropianë (PES) ka kërkuar sot një hetim urgjent dhe të plotë lidhur me pretendimet për parregullsi në zgjedhjet në Serbi.
Në njoftim thuhet se raportet e misionit vëzhgues të Parlamentit Evropian dhe OSBE-së tregojnë se autoritetet serbe, presidenti serb Aleksandar Vuçiq dhe kryeministrja Ana Brnabiq inkurajuan krijimin e kushteve të pabarabarta për partitë e tjera politike që morën pjesë në zgjedhje.
Sekretari i Përgjithshëm i PES, Giacomo Filibek tha se “është shumë shqetësuese që vëzhguesit ndërkombëtarë ishin unanim në gjetjet e tyre për parregullsitë në procesin zgjedhor”.
“Partia e Socialistëve Evropianë mbështet fuqishëm të ardhmen evropiane të Serbisë, por priste standarde më të larta demokratike nga një vend kandidat që po negocion anëtarësimin në Bashkimin Evropian,” tha Filibek.
Socialistët evropianë shprehin mbështetjen e tyre për anëtarin e misionit vëzhgues ndërkombëtar, deputetin e Parlamentit Evropian, Andreas Shider, i cili u sulmua nga autoritetet serbe në lidhje me raportin për parregullsitë zgjedhore.
Duke parë dhunën gjatë protestave të opozitës pas zgjedhjeve në Serbi, veçanërisht në Beograd, PES u bën thirrje autoriteteve të bëjnë më të mirën për të gjetur një zgjidhje paqësore dhe demokratike të krizës, duke deklaruar se janë seriozisht të shqetësuar nga raportet e mediave se autoritetet kanë mobilizuar mbështetësit për të provokuar dhunë gjatë protestave paqësore.Grupi shprehu solidaritetin me Partinë për Liri dhe Drejtësi (SSP) dhe deputeten dhe deputeten e SSP-së Marinika Tepiq, e cila është në grevë urie, si dhe me të gjithë deputetët e opozitës që po protestojnë për shkak të parregullsive zgjedhore, thuhet në njoftim./Kosovatimes/
