Në prag të ndërrimit të moteve, kryeministri Albin Kurti bashkë me ministren e Drejtësisë, Albulena Haxhiun, ministrin e Punëve të Brendshme, Xhelal Sveçlën dhe drejtorin e Policisë, Gazmend Hoxha, vizituam familjet e dy policëve, heronj të Kosovës të rënë në detyrë, Afrim Bunjaku e Enver Zymeri.
Siç tha Kurti, Afrim Bunjaku e Enver Zymeri janë dy emra heronjsh, që si oficerë policie ranë në krye të detyrës për sundimin e ligjit, integritetin territorial dhe sovranitetin shtetëror të Republikës së Kosovës.
“Në Samadrexhë, gruas Lumnijes, vajzës Arbenitës dhe dy djemve Fatlumit e Jetlumit, motrës Fexhrijes si dhe të afërmve të tjerë, iu shprehëm edhe njëherë mirënjohjen e thellë për sakrificën dhe kontributin e rreshterit të Policisë, heroit tonë Afrimit. Aty shkuam bashkë me djalin e Enver Zymerit, Sokolin”, shkruan Kurti në facebook.
“Nga aty, me dy djemtë e Afrim Bunjakut, Fatlumin e Jetlumin vizituam familjen e Enver Zymerit. Na pritën vëllau Egzoni, gruaja Drita, djali Sokoli, vajzat Luljeta e Rinesa, axha Ramadani dhe shumë të tjerë. Enverin e kujtoj dy herë. Një herë për shërbimin dhe sakrificën e tij dhe një herë tjetër për Bacën Rremë, babain e tij, Muharremin, shokun tim të burgut, me të cilin e kam ndarë të njëjtën qeli për një vit, në burg të Serbisë, e i cili ndërroi jetë para dy vitesh”, ka shkruar Kurti në Facebook.
Festat e fundvitit, sipas tij, do të ishin më të plota me Afrimin e Enverin. “Por, ne nuk i harrojmë asnjëherë sepse ata janë historia krenare e Republikës sonë”, tha Kurti. /Kosovatimes/
