Shtetet e Bashkuara nuk janë përshirë në asnjë mënyrë në shpërthimet që tronditën Iranin të mërkurën dhe nuk kanë arsye të besojnë se u përfshi Izraeli, tha zëdhënësi i Departamentit amerikan të Shtetit, Matthew Miller.
Së paku 103 njerëz u vranë dhe mbi 170 u plagosën nga dy shpërthime mëngjesin e së mërkurës gjatë ceremonisë së shënimit të 4-vjetorit të vdekjes së gjeneralit të Gardës Revolucionare Islamike të Iranit, Qassem Soleimani, i cili ishte vrarë më 2020 nga një sulm me dron.
Zyrtarët iranianë i kanë cilësuar shpërthimet e dy bombave në qytetin Kerman, ku është varrosur Soleimani, si sulm “terrorist”, pa dhënë hollësi të tjera.
“Shtetet e Bashkuara nuk janë përfshirë në asnjë mënyrë, dhe çfarëdo sugjerimi për këtë është qesharak”, tha Matthew Miller të mërkurën mbrëma.
Ai shtoi se ShBA-ja “nuk ka arsye të besojë se Izraeli është përfshirë në këto shpërthime”.
Shpërthimet në Iran ndodhën një ditë pasi numri dy i Hamasit, Saleh al-Arouri, u vra nga një sulm i dyshuar izraelit në kryeqytetin e Libanit, Bejrut.
Hamasi është shpallur organizatë terroriste nga Shtetet e Bashkuara dhe Bashkimi Evropian.
Miller e cilësoi Arourin si një “terrorist brutal me duar të përlyera me gjakun e civilëve”.
Ai bëri thirrje kundër përshkallëzimit të luftës në rajonin e Lindjes së Mesme.
“Nuk është në interesin e askujt – të asnjë vendi në rajon, të asnjë vendi në botë – që ky konflikt të përshkallëzohet më shumë seç është përshkallëzuar tashmë”, tha Miller.
Miller nuk deshi të komentojë se kush ka mundur ta kryejë sulmin në Iran.
