Koreja e Veriut ka gjuajtur më shumë se 200 predha artilerie nga bregu i saj perëndimor drejt ishullit jugor të Yeonpyeong, njoftoi ushtria e Seulit, raporton BBC .
Menjëherë më pas, Koreja e Jugut lëshoi një paralajmërim evakuimi për civilët në ishull, por ata nuk konfirmuan se ngjarjet ishin të lidhura.Jugu e dënoi këtë veprim duke e quajtur akt provokues.
Në vitin 2010, artileria e Koresë së Veriut qëlloi në ishullin Yeonpyeong, duke vrarë katër persona.
Predhat e artilerisë të lëshuara të premten midis orës 9 dhe 11 të mëngjesit me orën lokale nuk hynë në territorin e Koresë së Jugut, por të gjitha ranë në zonën tampon midis dy vendeve.
Shefi i Shtabit të Koresë së Jugut tha se ky incident nuk shkaktoi asnjë dëm për popullatën apo ushtrinë e Koresë së Jugut, por ai vuri në dukje se akti kërcënonte paqen në Gadishullin Korean dhe ngriti tensionet.
Pheniani tha se do të tërheqë të gjitha masat e marra për të parandaluar konfliktin ushtarak në të gjitha sferat, duke përfshirë tokën, detin dhe ajrin, dhe do të vendosë forca më të forta të armatosura dhe një lloj të ri pajisjesh ushtarake në zonën kufitare.
Koreja e Veriut e ka shkelur në mënyrë të përsëritur paktin në dy vitet e fundit duke lëshuar raketa dhe duke gjuajtur predha artilerie në det në drejtim të Jugut. Herën e fundit që Koreja e Veriut qëlloi predha artilerie në det ishte në dhjetor 2022 dhe nëntë incidente të ngjashme u regjistruan vetëm në atë vit.
Ishulli Yeonpyeong, i cili ka një bazë ushtarake dhe një popullsi të vogël civile prej rreth 2,000 njerëz, ndodhet tre kilometra nga kufiri detar i diskutueshëm në Detin e Verdhë dhe 12 kilometra nga bregu i Koresë së Veriut, dhe ka qenë skena e konflikteve detare midis dy Kore gjatë viteve.
