Kreu i Pentagonit, Sekretari Amerikan i Mbrojtjes, Lloyd Austin, u shtrua në spital me semurje onkologjike, raporton Qendra Mjekësore Kombëtare Ushtarake Walter Reed. Një deklaratë spitalore e cituar nga CNN vuri në dukje se ai po trajtohet për kancerin e prostatës, i cili u zbulua në fillim të dhjetorit.
Mjekët treguan se Austin iu nënshtrua një “procedure kirurgjikale minimale invazive” më 22 dhjetor. Kreut te Pentagonit iu zbulua semurja në një fazë të hershme, mjekët i vlerësojnë perspektivat si “të shkëlqyera”. Mjekët theksojnë se operacioni ka rezultuar i suksesshëm dhe ministri i cili ishte nën anestezion të përgjithshme është kthyer në shtëpi të nesërmen në mëngjes.
Informacioni publik për shtrimin në spital të ministrit u bë i disponueshëm vetëm më 5 janar, kur Pentagoni lëshoi një mesazh ku thuhej se ministri ishte në spital me komplikime nga operacioni rutinë.
Siç sqaroi sekretari i shtypit i Pentagonit, Patrick Ryder, Austin iu nënshtrua një procedure të planifikuar mjekësore më 22 dhjetor dhe u kthye në shtëpi të nesërmen. Megjithatë, në mbrëmjen e 1 janarit, ai “filloi të përjetonte dhimbje të forta”, pas së cilës u dërgua në spital dhe u vendos në njësinë e kujdesit intensiv. As zëvendësi i tij, as Shtëpia e Bardhë, madje as presidenti amerikan Joe Biden nuk e dinin këtë për katër ditë.
Sekretari i Mbrojtjes shprehu mirënjohjen e tij për mjekët dhe pranoi se ai “mund të kishte bërë një punë më të mirë për të siguruar që publiku të ishte i informuar siç duhet”. Partia Republikane shprehu shqetësimin për mungesën e transparencës së ngjarjeve dhe kërkoi shpjegime shtesë nga kreu i Pentagonit./kosovatimes/
