Deputetja demokrate Jorida Tabaku ka reaguar mbi të dhënat e publikuara nga INSTAT në lidhje me konsumin e popullatës dhe rënien me 0.53% të kësaj të fundit.
Sipas Tabakut, këto shifra nuk tregojnë gjë tjetër veçse inflacionin socialist dhe varfërimin e familjeve shqiptare nga taksat socialiste.
“Publikimi i të dhënave nga INSTAT në lidhje me konsumin e popullatës dhe rënia me 0.53% e konsumit të popullatës tregon pikërisht atë që kemi vite që e themi: inflacioni socialist dhe taksat socialiste kanë varfëruar familjet shqiptare.
Rënia e konsumit me 0.53% pikërisht në muajt e pikut tregon që sot familjet shqiptare po i konsumojnë më pak, se sot çmimet janë rritur, përqendrimi i ekonomisë në pak duar, rritja e taksave po prodhojnë një rritje të çmimeve dhe një varfërim të qytetarëve”, deklaron Tabaku.
Kjo e fundit theksoi se qeveria duhet të ndryshojë dhe të drejtojë sytë drejt asaj që është thelbi, mbijetesën e familjeve shqiptare.
Demokratja shprehet se struktura e ekonomisë shqiptare dhe shpërndarja e pasurisë në pak duar, po rezulton në rënie të konsumit dhe varfërim të familjeve shqiptare.
“Rritja me 7% e produkteve të shportës, miellit, vajit, bukës dhe ushqimeve tregon pikërisht faktin se familjet shqiptare janë në ngërç.
Vendosja e TVSh-së me produktet bujqësore ka rritur çmimet zinxhir dhe ka bërë që sot familjet shqiptare të konsumojnë më pak, por nga ana tjetër dhe struktura që sot ekonomia shqiptare ka dhe shpërndarja e pasurisë në pak duar, po rezulton në rënie të konsumit dhe varfërim të familjeve shqiptare, më pak blerje dhe sigurisht vendimet e 10 viteve që reflektojnë në xhepat e qytetarëve shqiptarë.
Kjo do duhet të shërbente për qeverinë si një mënyrë për të ndryshuar dhe të merreshin me atë që sot është thelbi: mbijetesa e familjeve shqiptare”, shprehet deputetja.
