Ministrja e Punëve të Jashtme dhe Diaporës, Donika Gërvalla, ka pritur sot në takim homologun e saj shqiptar, Igli Hasani, i cili ndodhet në vizitën e tij të parë zyrtare në Kosovë.
Ajo e ka falënderuar ministrin Hasani për vizitën dhe bisedën vëllazërore.
“Së bashku me homologun tim dhe dy delegacionet tona, mbrëmjen e kaluam në Dubovik, fshatin në të cilin familja Gërvalla me dekada të tëra ka pritur miq në kohë të mira e në kohë të vështira. Ministrin Hasani e falënderova nga zemra për vizitën dhe bisedën shumë të ngrohtë dhe vëllazërore në Kullën e Gërvallajve, Shtëpinë Muze të Jusuf e Bardhosh Gërvallës. Mesazhi që përçon kjo vizitë në këtë vend dhe në prag të datës 17 janar, 42-vjetorit të atentatit në Gjermani, shkon shumë përtej një vizite zyrtare të një Ministri të Punëve të Jashtme në një vend fqinj”, ka shkruar Gërvalla në Facebook.
Ajo tutje ka thënë se Republika e Shqipërisë është partneri më i dashur dhe më i rëndësishëm i Republikës së Kosovës.
“Thellimi dhe forcimi i marrëdhënieve tona të shkëlqyeshme në të gjitha fushat, është jo vetëm amaneti i të parëve tanë, por i kontribuon zhvillimit të të dy vendeve tona dhe stabilitetit dhe paqes afatgjatë të rajonit tonë”, është shprehur tutje ministrja Gërvalla.
Ajo ka bërë të ditur se nesër nga ora 09:00 do të mbajnë një takim në Ministrinë e Punëve të Jashtme dhe Diasporës, kurse më pas do të deklarohen edhe për media. /Kosovatimes/
