“Prishtina Parking” ka njoftuar se do të implementojë rregulloren e re të parkimit që nga data 22 janar të vitit 2024.
Ky njoftim u bë i ditur përmes postimit në faqen zyrtare të ndërmarrjes në Facebook.
Rregullorja e re parasheh një sërë ndryshimesh që prekin mënyrën e parkimit në kryeqytet.
Sipas detajeve të dhëna në njoftim, tashmë banorët rezidentë do të përfitojnë nga parkimi falas për mjetin e tyre të parë në rrugën ku jetojnë, pasi të kenë kryer një regjistrim të kodifikuar për tërë qytetin, i cili ka një tarifë njëherëshe prej 10 eurosh.
Për mjetin e dytë, tarifa do të jetë më e lirë, duke kushtuar 10 euro në muaj.
Në mes të ndryshimeve të tjera të rëndësishme, laurat do të hiqen nga lagjet rezidenciale dhe do të zgjatet orari i parkimit në Zonat 1 dhe 2 deri në orën 23:00.
Banorët rezidentë do të kenë përparësi në procesin e regjistrimit përpara subjekteve juridike dhe lokaleve të biznesit, dhe parkimi do të jetë falas gjatë ditëve të shtunë dhe të diel në hapësirat e parkimit të hapura.
Njoftimi përfshin edhe informacion se si do të funksionojë sistemi i rimburshimit për parapagimet e bëra për periudhën pas datës 22 Janar, ku përfshihet një zbritje prej 10 eurosh që do të aplikohet si pagesa administrative.
Ajo që e bën këtë rregullore edhe më transparente është procedura e trajtimit të ankesave dhe mundësia e publikimit të përgjigjeve në rast se kërkohet nga ankuesi. Të gjitha parkingjet tani do të kenë sinjalistikë horizontale dhe vertikale që përmban informata të plota për kufizimet dhe të drejtat.
Për të marrë informacion të mëtejshëm, qytetarët mund të referohen në web-faqen e “Prishtina Parking” apo në rrjete sociale, ku do të publikohen edhe detajet e çmimores së re të miratuar nga Kuvendi Komunal.
Ndryshimet kryesore në rregullore janë si në vijim:
- Vetura e parë pa pagesë për banorët rezident në adresën/rrugën e tyre ose pas aplikimit të kodifikimit në të gjithë qytetin, në segmentin e tyre (10 euro kosto e regjistrimit e cila aplikohet vetëm një herë).
- Kosto më e lirë për veturën e dytë (10 euro për muaj).
- Zgjatja e orarit në Zonën 1 dhe 2 deri në ora 23:00.
- Kufizim i parkimit në lagjet rezidenciale për vizitorë në orët e mbrëmjes dhe më shumë hapësira në dispozicion për banorët rezident.
- Largim i të gjitha laurave në lagjet rezidenciale.
- Prioritet në regjisrim për banorët rezident kundrejt subjekteve jurdike/lokaleve afariste. Vetëm pas përfundimit të regjistrimit të banorëve, do të hapet procedura për pagesë nga ana e subjekteve jurdike dhe lokaleve afariste.
- Dita e shtunë dhe e diel pa pagesë në parkingjet e hapura.
- Në rast të mospagesës së parkimit nga ana e klientëve dhe vendosjes së bllokadës, tiketa e vendosur së bashku me bllokadën është biletë e vlefshme parkimit për 24 orët e ardhshme në cilëndo zonë dhe vendparkim të hapur (kufizimet vlejnë sipas orarit për lagje).
- Parking pa pagesë për personat me nevoja të veçanta dhe për invalidët e UÇK-së, e vlefshme në hapësirat me sinjalistikë për persona me aftësi të kufizuararegjistrimi pranë ndërmarrjes dhe pajisja me leje është e detyrueshme).
- Shtim i procedurës për rimbursim në rast të gabimeve teknike që kanë arsyeshmëri të plotë nga ana e klientëve.
- Procedurë tejet transparente e trajtimit të ankesave, me mundësi publikimi të përgjigjes në rast se kërkohet nga ankuesi.
- Të gjitha parkingjet do të kenë sinjalistikë horizontale dhe vertikale. Sinjalistika vertikale do të përmbajë të gjitha informacionet e nevojshme lidhur me kufizimet, të drejtat si dhe llojin e parkingut (rezidencial, komercial apo i kombinuar).
- Çmimorja do të publikohet në web-faqen e N.P.L. “Prishtina Parking” brenda kësaj jave, e po ashtu edhe në rrjetet sociale të N.P.L. “Prishtina Parking”. Në shtojcën e rregullores mund të gjeni çmimoren e miratuar nga Kuvendi Komunal.
Informacion shtesë
– Të gjithë qytetarët që kanë parapagim përtej datës 22 Janar 2024 do të rimbursohen, duke zbritur shumën prej 10 euro për ta cilësuar si pagesë të tarifës administrative.
– Të gjithë qytetarët të cilët i kanë dokumentet e plota në ndërmarrje do të njoftohen për të nënshkruar kontratën e re dhe nuk kanë nevojë të sjellin dokumente shtesë.
– Rregulloren mund ta gjeni KËTU. /Kosovatimes/
