Policia e rajonit të Ferizajt ka bërë me dije se plani në përkujtim të masakrës së Reçakut ka kaluar pa asnjë incident dhe aksident.
Në njoftimin e lëshuar për media thuhet se gjatë ditës së sotme policia ka zbatuar planin operativ “Përvjetori i 25-të i Masakrës së Reçakut”, për të garantuar sigurinë e ngjarjes së përvjetorit të masakrës së Reçakut dhe sigurinë e të gjithëve.
“Stacioni i Policisë në Shtime i mbështetur dhe i përkrahur nga policë të stacionit në Ferizaj, Kaçanik, policë të Njësisë së Komunikacionit Rrugor, policë të Sektorit Rajonal të Hetimeve dhe njësi tjera rajonale, nga ora 06:00 e mëngjesit, e deri në përfundim i ka marrë masat e nevojshme të sigurisë, që nga mbajtja e akademisë përkujtimore në Shtime dhe vizitat e planifikuara shtetërore, diplomatike dhe vizitat e qytetarëve në fshatin Reçak të Shtimes”, thuhet në njoftim.
Policia Rajonale e Ferizajt falënderon qytetarët që patën durim gjatë lëvizjes së orientuar nga policia, në drejtim të Kompleksit Memorial “Masakra e Reçakut ” në fshatin Reçak të Shtimes. /Kosovatimes/
