Në Komisionin parlamentar për Siguri është diskutuar për tematika të ndryshme që lidhen me Policinë e Kosovës dhe sigurinë në vend.
Ndër temat e diskutuara ishte edhe sulmi terrorist në Banjskë që ndodhi shtatorin e vitit të kaluar.
Ministri i Brendshëm Xhelal Sveçla ka thënë se me rastin e Banjskës janë angazhuar një numër rekord hetuesish dhe zyrtarësh tjerë policorë për të zbardhur të vërtetën.
“Një pjesë e këtyre dëshmive tashmë janë publike derisa dëshmi tjera janë në duart e Prokurorisë. Unë besoj fuqishëm se është koha e fundit që Prokuroria e Kosovës të fillojë me ngritjen e aktakuzave, apo të paktën të japë një raport përfundimtar”, ka deklaruar Sveçla.
Ai ka thënë se është e nevojshme që me raportin përfundimtarë duhet të njoftohen edhe partnerë ndërkombëtarë në mënyrë që sipas tij kjo të përdoret edhe politikisht.
“Duke qenë se siguria është e ndërlidhur edhe me diplomacinë, është e nevojshme që edhe partnerët tanë ndërkombëtarë duhet të dinë se çfarë ka ndodhur me rastin e sulmit në Banjskë dhe çfarë është zbuluar në lidhje me funksionimin e këtij grupi terroristë. Duhet të dihet kush e ka mbështetur financiarisht e me trajnime”.
“Unë jam i bindur se tashmë ka dëshmi më se të mjaftueshme që të ngritët aktakuzë ndaj këtyre terroristëve”.
Sveçla thotë se Kosova është me fat që ka siguruar video nga trajnimi i terroristëve dhe madje edhe nga vet dita e betejës.
Ai thotë se një pjesë e madhe janë identifikuar dhe dihet se ata kanë të kaluar kriminale.
Edhe deputetja britanike Alicia Kearns kishte deklaruar ditë më parë se duhet të ketë një raport përfundimtarë në lidhje me sulmin në Banjskë.
Ajo madje ka shtuar se një vend i rëndësishëm duke aluduar në SHBA-në se kanë raportin e hetimeve për rastin e Banjskës.
