Sot shënohet 42 vjetori i vrasjes së veprimtarëve të shquar të çështjes kombëtare, Jusuf e Bardhosh Gërvalla dhe Kadri Zeka.
Në orën 11:00, Presidentja e Republikës së Kosovës, Vjosa Osmani bën homazhe te varret e Jusuf dhe Bardhosh Gërvallës, në Dubovik.
Më pas Presidentja Osmani viziton edhe kullën e familjes Gërvalla.
Ndërkaq, në orën 13:00, Presidentja Osmani vendos kurorë lulesh te busti i Kadri Zekës, në Prishtinë.
Ndryshe vëllezërit Gërvalla dhe Kadri Zeka, si veprimtarë të shquar të çështjes kombëtare u vranë nga shërbimi sekret jugosllav 42 vite më parë në Shtutgart të Gjermanisë. As pas mbi katër dekada, vrasja e tre veprimtarëve shqiptarë nuk është zbardhur.
Atentati mbi dy vëllezërit Gërvalla dhe Kadri Zeka kishte ndodhur në Gjermani, teksa nga autoritet shtetërore gjermane ishte lajmëruar se vrasës të panjohur kanë vrarë tre persona dhe se ky ishte kulminacion i ri në luftën e fshehtë në të cilën agjentët e sigurimit jugosllav dhe kundërshtarët e pushtetit po luftonin mes tyre.
