Aleanca për Ardhmërinë e Kosovës (AAK) sot ka nënshkruar koalicionin parazgjedhor me Nisma.
Pas nënshkrimit të këtij koalicioni, kryetari i AAK-së, Ramush Haradinaj dhe kreu Nisma-s, Fatmir Limaj, thanë se kjo po bëhet me qëllim që të kenë një alternativë të re për qytetarët e vendit.
Lideri i AAK-së, Ramush Haradinaj, tha se aspirojnë të jenë të parët në opsionet qeverisëse. Ai tha se do të punojnë së bashku për integrimin e Kosovës, në strukturat euroatlantike, përfshirë NATO.
Kurse lideri i NISMA-s, Fatmir Limaj, tha se Kosova ka nevojë për një dinamikë të re dhe për një alternativë të re opozitare. Ai ka kërkuar që të gjithë ata që duan të bashkohen dhe të i japin vendit një dinamikë. Limaj beson se kjo do të sjellë energji të re për qytetarët e Kosovës.
Ndryshe kjo marrëveshje koalicioni bëhet për zgjedhjet e përgjithshme të radhës (2024-2025).
Të dyja partitë dakordohen që të krijojnë Rreshtin (Frontin) e përbashkët për Shtetin e Kosovës dhe përcaktohen të hapura për zgjerim të koalicionit me të gjitha ato parti politike, nisma qytetare apo shoqata që përfaqësojnë sfera të ndryshme interesi e që për synim kanë ndaljen e degradimit të shtetit, rikthimin e demokracisë si parakusht të një zhvillimi të qëndrueshëm e afatgjatë, si dhe integrimin e Kosovës në strukturat euro-atlantike, kjo në partneritet të përhershëm me aleatët strategjikë, ShBA dhe BE.
Aleanca për Ardhmërinë e Kosovës dhe Nisma Social Demokrate, garojnë në një Listë të Përbashkët dhe marrin përsipër që të harmonizojnë platformën politike dhe Programin për zgjedhjet e përgjithshme, kurdo që të mbahen ato. Objektivat politike dhe aspektet teknike të këtij koalicioni, specifikohen me një aneks të veçantë që do t’i bashkohet marrëveshjes. /Kosovatimes/
