Shkruan: Dan IBRAHIMI
Ka vdekur dhe është varrosur dje ish kryetari i Lidhjes së Shkrimtarëve të Kosovës, poeti i shquar Adem Gashi, por lajmi ende nuk paska mbërritur në zyrën e Lidhjes në fjalë. Engjëll Gabrieli është dashur t’ua dërgojë me shkrim.
Kanë shkruar kush më pak dhe kush më shumë, të gjitha mediat shqip dhe rrjetet sociale, por lajmi ende nuk paska trokitur në derën e Lidhjes së Shkrimtarëve të Kosovës! Engjëll Gabrieli është dashur t’ua dërgojë me vulë.
Kanë dërguar telegrame ngushëllimi dhe kanë publikuar komente respekti dhe nderimi edhe politikanët, pozitë dhe opozitë me rastin e humbjes së një shkrimtari që ka lënë gjurmë dhe të një ish kryetari të LShK-së, por kjo e fundit siç duket ende nuk e ka njoftimin zyrtar të vërtetuar. Engjëll Gabrieli është dashur t’ua dërgonte të dyllosur.
Fundja, në LShK të gjithë janë të letrave (shkrolave) dhe vetëm të zezës në të bardhë i besojnë. Derisa të vijë fermani me myhyr të Zotit, ata edhe nuk kanë arsye të besojnë që paska vdekur poeti i madh dhe ish kryetari i tyre. Me siguri lutjet e tyre janë që lajmet e dhëna mbi vdekjen e poetit të jenë të pavërteta dhe nesër të na shfaqet Ai në “Amaro” për kafenë e mëngjesit. Mund të ndodh edhe kjo! Aty në bodrumin e shoqatës te “Kulla e Zotnisë”, pranohen vetëm lajmet e verifikuara, domethënë në këtë rast vdekja e certifikuar, ndryshe do të tallej bota pastaj.
Unë i besoj lekës së LShK-së pasi ajo mbledh e stërmbledh, si një detabazë, dijet, përvojat dhe analizat e shumta brendapërbrenda vetes.
