Kryetari i Aleancës për Ardhmërinë e Kosovës, Ramush Haradinaj, ka thënë se partia që drejton është e hapur për koalicione për zgjedhjet e ardhshme.
Në një deklarim për media të enjten, Haradinaj ka thënë se koalicioni i AAK-së me NISMA-n që u zyrtarizua një ditë më parë, nuk është marrëveshje e mbyllur.
“Marrëveshja jonë me NISMA-n është e ndërtuar si e tillë që të jetë e hapur. Pra, nuk është marrëveshje e mbyllur. Është e konceptuar që kushdo që i bashkohet këtij koalicioni, mos mu ndi i ardhur por me u ndi si në shtëpinë e vet”, është shprehur ai.
I pari i AAK-së më tej ka akuzuar pushtetin për arrogancë dhe sipas tij, Qeverisë Kurti i ka bërë punë mashtrimi.
Haradinaj ka përmendur vizitën e krerëve të institucioneve në Reçak, duke thënë se atje kanë shkuar me 20 xhipa të zi, duke e lënë përshtypjen, sipas Haradinajt, se “ia kanë mësy Serbisë për pushtim”.
Ai ka rikujtuar deklarimet e Kurtit për punën e xhipave të zi dhe ka thënë se tashmë pushteti po ndjehet arrogant meqë iu ka “funksionuar mashtrimi”.
“Unë isha në Reçak para tre ditësh, ju siguroj mbi 20 xhipa të zi kanë qenë këta pushtetit që kanë ardhë. 20 xhipa një pas një për me shku në Reçak nëse e merrni vetëm këtë shembull pastaj e zbërtheni këtë në hipokrizi të mashtrimeve”.
“S’po du me u përsëritë, po veç mjafton ta kishit pa foton e delegacionit institucional në Reçak, 20 xhipa të zi një pas një, thu t’i ia kanë mësy Serbinë diku me pushtue”, ka potencuar mes tjerash lideri opozitar.
Sipas tij, për këtë qytetari do ta ndëshkojë kryeministrin Albin Kurti në zgjedhjet e ardhshme.
“Vërtetë ky vetëbesim i tyre buron nga arroganca, se qytetari i duron, i toleron, ja u pranon mashtrimin po edhe mundet me qenë ndryshe. Qytetari ashtu si ju ka jep njëherë besimin, mundet me ja u marr dhe ka pasur edhe në të kaluarën raste kur qytetari i ka ndëshku mund të i ndëshkoj edhe këta. Besoj se qytetari do t’i ndëshkojë. Jam më se i sigurt për këtë”, ka theksuar Haradinaj.
