Në janar të vitit të kaluar, Komuna e Skenderajt ishte përballur nga vërshimet të cilat fatmirësisht s`kishin bërë dëme në njerëz, përveç atyre materiale. Ndërkohë, situata aktualisht është ndryshe. Dëmet janë riparuar por komunarët kanë ankesa në institucionet qendrore sa i përket përkrahjes për sanimin e dëmeve.
Vërshimet që ndodhën në janarin e vitit të kaluar shkaktuan dëme të mëdha. U dëmtuan biznese, toka bujqësore e ekonomi familjare. Madje fshati Tushilë ishte vendi më i prekur nga këto vërshime, pasi lumi Klina kishte dalë nga shtrati duke depërtuar brenda shtëpive. Këtë fat të keq në mesin e shumë familjeve e kishte edhe ajo e Arif Sadikut.
Por, një vit pas vërshimeve situata në Skenderaj është krejt ndryshe. Shtëpitë janë rinovuar e rindërtuar, e jeta i është kthyer normalitetit.
Për këtë, Arif Sadiku përfaqësues i fshatit Tushilë falënderon institucionet komunale e qendrore për përkrahjen.
“Ka shkaktuar dëme të mëdha. I ka demoluar të gjitha pajisjet. I falënderojmë të gjithë që na kanë dalë në ndihmë jo vetëm komuna e qeveria, por edhe të gjithë qytetarët në mënyrë individuale”, tha ai.
Megjithatë në komunën e Skenderajt nuk janë edhe aq të kënaqur me ndarjen e mjeteve nga Qeveria për kompensimin e dëmeve.
“Deri më tash në bazë të informatave që i kemi Qeveria ka kompensuar një pjesë të ekonomisë familjare, me një rimbursim sipas informatave rreth 90 për qind, kurse për dëmet në bujqësi dhe infrastrukturën publike ende nuk është ndarë asnjë cent për kompensimin e këtyre dëmeve…”, tha Amir Lushtaku, zëdhënës në Komunën e Skenderajt.
Ndërkohë në mesin e dhjetorit të vitit të kaluar qeveria ka ndarë mbi 4 milionë euro në ndihmë të të dëmtuarave nga vërshimet.
