Forumi i Rinisë i LDK-së në mënyrë të organizuar në orët e mbrëmjes kanë ndezur qirinj për 18-vjeçarin, Lulzim Fejzullahu, të cilit padrejtësisht; në mënyrë mizore iu mor jeta. “Sot, të gjithë jemi Lulzimi!”, ishte motoja e këtij organizimi.
Kryetari i Forumit të Rinisë, Paris Guri, tha se ndezën qirinj për ta kujtuar Lulzimin, që padrejtësisht e në mënyrë makabre iu morë jeta në lule të rinisë!
“Lulzimin nuk guxojmë assesi ta shohim si një lajm shtesë në kronikën e zezë. Sot të gjithë jemi Lulzimi, sepse nuk është vrarë vetëm Lulzimi, është rrezikuar siguria e të rinjve, është shuar shpresa për jetë të mirë”, tha ai.
Forumi qendror rinor i LDK-së bashkë me forumin e degës në Podujevë kërkuan, llogaridhënie e përgjegjësi nga institucionet publike, asgjë më pak! Kanë obligim kushtetues për të mbrojtur të drejtat e njeriut!
“Rasti tronditës i Lulzimit duhet të jetë alarmues për të gjithë; duhet t’i thërrasë ndërgjegjes institucionale dhe ndërgjegjes sonë kolektive në mënyrë që masat parandaluese dhe mbrojtëse për sigurinë e të rinjve të ndërmerren në mënyrë emergjente. Të rinjve duhet t’u sigurohet më shumë mbrojtje në rrugë, në shkollë dhe në të gjitha vendet ku ata veprojnë”, ka thënë kryetari i Forumit të Rinisë, Paris Guri. /Kosovatimes/
