Kryeministri i Kosovës, Albin Kurti, në mbledhjen e qeverisë ka treguar të premten prioritet për këtë vit. Në sektorin e arsimit, Kurti ka thënë se do të fokusohen në rritjen e përfshirjes dhe qasjes së barabartë në edukimin në fëmijërinë e hershme.
Ai ka përmendur edhe furnizimin me pajisje teknologjike dhe digjitalizimin në arsimin parauniversitar.
“Njëkohësisht, prioritet për Ministrinë e Arsimit, Shkencës, Teknologjisë dhe Inovacionit do të jetë ngritja e cilësisë së arsimit parauniversitar përmes konsolidimit të mekanizmave për sigurim të cilësisë, instrumenteve matëse dhe rritjes së numrit të inspektorëve”, ka thënë ai.
Po ashtu ka thënë se prioritet do të jetë edhe ndërlidhja e arsimit me tregun e punës duke e zgjeruar atë në kuadër të arsimit dual.
“Tashmë ka gjithsej 12 profile, të cilat po gjejnë zbatim në 21 shkolla, në 14 komuna të Kosovës”, ka thënë ai.
