Kryeministri i Kosovës, Albin Kurti, në mbledhjen e qeverisë ka treguar të premten prioritet për këtë vit. Ai ka deklaruar se në shëndetësi, prioritet do të kenë investimet në pajisje moderne dhe infrastrukturore, shtimi i shërbimeve në institucionet publike shëndetësore, dhe sistemi informativ shëndetësor.
Kurti ka përmendur edhe shtimin e disa shërbimeve të reja vitin që lamë pas si sedacioni inhalator në stomatologji; ultrazëri endoskopik; shërbimi falas për rikonstruktimin e gjirit për pacientët e prekur nga kanceri, dhe diagnostikimi i retinopatisë te foshnjat e lindura para kohe me pajisjen e re në Klinikën e Oftalmologjisë.
“Kurse nga java e kaluar, për herë të parë filloi ofrimi i shërbimit të implanteve dentare në Qendrën Stomatologjike Universitare të Kosovës”, ka thënë ai.
I pari i Qeverisë ka theksuar se shërbimet e reja si këto i sigurojnë qëndrueshmëri institucioneve publike shëndetësore, ndërkaq qytetarëve shërbime cilësore, me çmim të përballueshëm.
