Linjat e reja ajrore civile u krijuan në të gjithë hapësirën ajrore shqiptare për të lehtësuar fluturimet edhe nga Aeroporti i Prishtinës, thuhet në një njoftim të NATO-s. Sipas njoftimit, ky zhvillim i ri është rezultat i përpjekjeve të kryera në një proces të udhëhequr nga NATO që synon normalizimin e trafikut të aviacionit civil në të gjithë Ballkanin Perëndimor.
“Linjat e reja do të ndikojnë pozitivisht në aviacionin civil dhe do të ofrojnë përfitime të konsiderueshme, duke përfshirë kohë më të shkurtra fluturimi, konsum më të ulët të karburantit dhe reduktim të ndotjes. NATO ka mbështetur procesin e normalizimit të përdorimit të hapësirës ajrore mbi Kosovë që nga viti 1999, duke udhëhequr konsultimet e njohura si ‘Takimet e Normalizimit të Aviacionit Ballkanik’”, thuhet në njoftimin e NATO-s.
Tutje thuhet se në këto takime marrin pjesë rregullisht përfaqësues të vendeve aleate, autoritetet e navigacionit ajror, autoritetet ushtarake kombëtare dhe organizatat ndërkombëtare përkatëse, duke përfshirë Organizatën Ndërkombëtare të Aviacionit Civil, Agjencinë Evropiane të Sigurisë së Aviacionit dhe EUROCONTROL, ndër të tjera.
“Në vitin 2014, hapësira e sipërme ajrore mbi Kosovë u rihap. Kjo u bë e mundur nga kontributet e ofruara nga Hungaria dhe roli i kryer nga Ofruesi i saj i Shërbimit të Navigimit Ajror (HUNGAROCONTROL), i cili mori përsipër përgjegjësinë për të kontrolluar fluturimet mbi 21,000 këmbë. Në vitet e fundit, përmes Takimeve Ballkanike për Normalizimin e Aviacionit, NATO lehtësoi zyrtarizimin e një Marrëveshje Kornizë ndërmjet KFOR-it dhe Islandës”, thuhet në njoftim.
Sipas njoftimit, Autoriteti i Sigurisë së Transportit të Islandës (ICETRA) tani po vepron si funksion i mbikëqyrjes së sigurisë në mbështetje të komandantit të KFOR-it, i cili ruan autoritetin parësor për përdorimin e hapësirës së poshtme ajrore mbi Kosovë, sipas Rezolutës 1244 të Këshillit të Sigurimit të Kombeve të Bashkuara të vitit 1999.
“ ICETRA kryen shqyrtimi i të gjitha zgjidhjeve teknike që mundësojnë vendosjen e rrugëve të reja direkte, në hapësirën e poshtme ajrore, ndërmjet Prishtinës dhe qyteteve të tjera”, përfundon njoftimi. /Kosovatimes/
