Një çështje e cila ditëve të fundit është ngritur si debat edhe nga ambasadorët e vendeve të QUINT-it, pas reagimit të presidentit serb Aleksandër Vuçiq rreth pretendimeve për ndalimin e dinarit serb në Kosovë, ka marrë përgjigje nga guvernatori i BQK-së, Ahmet Ismaili. Ai ka deklaruar për RTK-në se BQK është e pavarur në vendimet e saj dhe se askush nuk duhet ta influencojë këtë institucion.
Guvernatori i Bankës Qendrore të Kosovës, Ahmet Ismaili, ka sqaruar për RTK-në ecurinë e vendimit të BQK-së, ku nëpërmjet një rregulloreje nga 1 shkurti do të ndalohet përdorimi i dinarit serb në Kosovë.
Ai tha se vendimet e BQK-së nuk e cenojnë asnjë qytetar të Kosovës. Megjithatë, të gjitha transaksionet bankare dhe jobankare nga 1 shkurti i këtij viti duhet ta përdorin vetëm valutën euro.
Guvernatori foli edhe për reagimet që kanë ardhur nga bashkësia ndërkombëtare në lidhje me vendimin e BQK-së. Ismaili tha se BQK është e pavarur në vendimet e saj.
Edhe zëvendëskryeministri i Kosovës, Besnik Bislimi, u shpreh i qartë në lidhje me zbatimin e vendimit të BQK-së. Ai tha se nuk mund të lejohet diçka që nuk ka qenë e lejuar.
Ditë më parë, Banka Qendrore e Kosovës e ka miratuar një rregullore për operacionet me para të gatshme që parasheh euron si monedhën e vetme për kryerjen e transaksioneve.
