Media amerikane “YardBaker” ka listuar 23 qytetet më të mira evropiane për t’u vizituar gjatë pranverës. Në mesin e disa vendeve ku buxheti është në nivel dhe moti i mire mbizotëron, janë edhe dy qytete shqiptare: Prizreni e Tirana.
“Kryeqyteti kulturor i Kosovës nuk është në itineraret e shumë udhëtarëve. Por duhet të jetë! Koha më e mirë për ta vizituar është pranvera para se të bëhet shumë e nxehtë për të ecur deri në kala ose për të shijuar një kafe të shijshme të Kosovës përgjatë lumit”, ka shkruar “YardBaker”.
Tutje në artikull për Tiranën thuhet se ka pasur një rilindje falë turizmit të zhvilluar në Shqipëri.
“Numri i vizitorëve rritet me miliona çdo vit. Megjithatë, kjo do të thotë se qyteti i panjohur më parë po rritet në popullaritet, kështu që shkoni përpara qershorit për një përvojë më të qetë. Është gjithashtu shumë më e këndshme për sa i përket temperaturës”, vazhdon artikulli.
Cyrihu i Zvicrës, Athina e Greqisë, Grazi i Austrisë, Munihu i Gjermanisë janë disa nga kryeqendrat e tjera.
