Ministria e Shëndetësisë ka njoftuar se ka siguruar trajtimin pa pagesë në Turqi për pacienten 13-vjeçare, e cila ka pësuar djegie të renda trupore, si pasojë e shpërthimit të bombolës së gazit në Kçiq të Mitrovicës.
Sipas njoftimit të MSh-së, kjo është arritur përmes një marrëveshje me Ministrinë e Shëndetësisë në Turqi.
“Pacientja ka marrë trajtim dhe kujdes shëndetësor në QKUK, për më shumë se 10 ditë, mirëpo për shkak të gjendjes së rendë shëndetësore, me kërkesën e Ministrit të Shëndetësisë, Dr. Arben Vitia dhe me vendimin e Kryeministrit të Kosovës, Z. Albin Kurti janë siguruar edhe mjetet për transport special ajror urgjent, ku pacientja tashmë është hospitalizuar për trajtim në spitalin e Stambollit, në Turqi”, thuhet në njoftimin për media.
Sipas informatave nga spitali turk, vajza 13-vjeçare ka filluar të marrë trajtimin e nevojshëm dhe ministria i ka uruar shërim sa më të shpejt. /Kosovatimes/
