Bashkëpunimi në politikën e jashtme, thellimi i bashkëpunimit mes dy parlamenteve dhe mbështetja në anëtarësimin e Kosovës në organizata të tjera ndërkombëtare ishin temat qendrore të takimit të zëvendëskryeministres dhe ministres së Punëve të Jashtme dhe Diasporës të Republikës së Kosovës, Donika Gërvalla, me kryetarin e Komisionit për Politikë të Jashtme të Parlamentit të Principatës së Monakos, Fabrice Notari.
Sipas njoftimit të MPJD-së, gjatë takimit biseda u fokusua në aktualitetin politik dhe sigurinë në Kosovë dhe rajon, procesin e anëtarësimit të Kosovës në Këshillin e Evropës, marrjen e statusit të anëtarit të përhershëm në Organizatën e Frankofonisë dhe tema të tjera me interes të përbashkët.
“Ministrja Gërvalla shprehu falënderimin e saj ndaj Principatës së Monakos për mbështetjen që i ka dhënë Kosovës në fusha të ndryshme, e sidomos në fushën e telekomunikimit si dhe në procesin e anëtarësimit në organizata ndërkombëtare. /Kosovatimes/
