Pas takimeve të mbajtura në Principatën e Monakos, zëvendëskryeministrja dhe ministrja e Punëve të Jashtme dhe Diasporës e Republikës së Kosovës, Donika Gërvalla, nis vizitën zyrtare në Andorra, ku do të zhvillojë takime me krerët e institucioneve më të larta shtetërore të këtij shteti.
Bëhet e ditur se Gërvalla do të pritet në takim nga kryeministri, Xavier Espot Zamora, kryetari i Parlamentit, Carles Ensenyat Reig dhe ministrja e Punëve të Jashtme, Imma Tor Faus.
“Në fokus të takimeve do të jetë bashkëpunimi mes dy shteteve dhe mbështetja e Andorrës në rrugën e anëtarësimit të Kosovës në mekanizmat ndërkombëtarë”, njofton zyra për informim e MPJD-së.
Vizita e ministres Gërvalla në Andorra është një mundësi e mirë e zhvillimit dhe fuqizimit të raporteve diplomatike mes dy shteteve, rritjen e bashkëpunimit në turizëm, shkëmbim të eksperiencave në diplomaci dhe fusha tjera me interes të përbashkët, thuhet në këtë njoftim. /Kosovatimes/
