Ministria e Industrisë, Ndërmarrësisë dhe Tregtisë (MINT), përkatësisht Agjencia Për Regjistrimin e Bizneseve në Kosovë (ARBK), njofton se sot nënshkruan memorandum bashkëpunimi me Komunën e Mitrovicës Veriore përmes të cilit do të konsolidohet zyra e ARBK-së brenda kësaj komune, ku bizneset e reja do të mund të regjistrohen e poashtu do të kryhen edhe shërbime tjera për të gjitha bizneset.
“Nënshkrimit të memorandumit i parapriu takimi i ngrohtë në mes Ministres së Industrisë, Ndërmarrësisë dhe Tregtisë, znj. Rozeta Hajdari, dhe Kryetarit të komunës së Mitrovicës Veriore z. Erden Atiq, gjatë të cilit u diskutuan mundësitë përmes skemave të ndryshme mbështetëse për zhvillim të bizneseve nga kjo komunë”, njofton MINT.
Përveç kësaj, thuhet tutje në këtë njoftim, ministrja Hajdari dhe Kryetari Atiq u dakorduan për bashkëpunim sa më të afërt dhe për shtrirje të mbikëqyrjes së tregut nga ana e Inspektoratit Qendror të Tregut, ku së shpejti do të funksionalizohet edhe zyra për inspektorët që do të zhvillojnë aktivitetin në komunën e Mitrovicës Veriore. /Kosovatimes/
