Pas një sëmundjeje të rëndë e të gjatë vdiq ish-drejtori i parë shqiptar i shkollës “Hasan Prishtina” në Prishtinë, i cili gjatë viteve nëntëdhjetë ishte i pakompromis në mbrojtjen dhe ruajtjen e sistemit arsimor në gjuhën shqipe.
Ali Gashi shkollën fillore e kreu në shkollën “Avni Rrustemi” në Mramor, ndërsa shkollën e mesme “Miladin Popoviq” (normalen) në Prishtinë. Fakultetin Filologjik, Degën e Gjuhës dhe Letërsisë Shqipe e kreu në Prishtinë.
Punoi si mësues, arsimtar dhe profesor në shkolla të ndryshme si në SHF “Avni Rrustemi” në Mramor; në SHF ”Zenel Hajdini” në Prishtine; në SHMM ”Ali Sokoli” në Prishtinë; në Gjimnazin “Xhevdet Doda” gjithashtu në Prishtinë; dhe që nga viti 1978 punoi në shkollën “Hasan Prishtina”. Në këtë shkollë punoi si zëvendësdrejtor i shkollës prej vitit 1978-1989. Prej vitit 1988 e deri në muajin nëntor të vitit 1999 punoi si drejtor i kësaj shkolle. Nga viti 1999 dhe deri në vitin 2001, kur edhe u pensionua, punoi si drejtor i shkollës edhe në SHF “Asim Vokshi” në Prishtinë.
Ali Gashi në procesin arsimor punoi gjithsej 35 vjet. Nga këto vite, 15 vjet punoi si mësimdhënës, ndërsa më se 20 vjet punoi si zëvendësdrejtor dhe drejtor i kësaj shkolle dhe i SHF “Asim Vokshi” në Prishtinë, kur edhe u pensionua si invalid i punës.
Është nderuar shumëherë me mirënjohje nga kolektivi i SHF ”Hasan Prishtina”. Posedon mirënjohjet e të gjitha kolektiveve ku ka punuar, të cilat i janë ndarë gjatë punës së tij të suksesshme.
Gjatë punës si drejtor në këtë shkollë në vitin 1994, nga gjykata e atëhershme serbe u dënua me gjashtë muaj burg, për rezistencë dhe thirrje në rezistencë ndaj regjimit serb.
Ngushëllime familjes por edhe kolektivit dhe nxënësve e ish-nxënësve për të cilët u sakrifikua shumë herë gjatë kohës sa ishte pjesë e kolektivit të shkollës të cilën e vizitoi çdo herë për festat e shkollës.
Në korrik të vitit 2020, drejtori Ali Gashi u nderua me mirënjohje për kontributin atdhetar dhe për veprimtari kombëtare edhe nga kryeministri i Kosovës z.Hashim Thaçi.
Do të mbeteni përherë i paharruar në mesin e nxënësve dhe mësimdhënësve të shkollës për të cilën sakrifikuat aq shumë.
Drejtoria, kolektivi dhe nxënësit e SHF&SHMU “Hasan Prishtina” në Prishtinë. /Kosovatimes/
