Zyrtari i Partisë Demokratike të Kosovës, Arben Mustafa, përmes një publikimi të një grafike nga Instituti GAP për të dhënat nga BQK, ka kritikuar Qeverinë Kurti, duke vlerësuar si dëshmi e frikshme e përkeqësimit të gjendjes ekonomike në vend.
“Detyrimi i qytetarëve dhe bizneseve për të shfrytëzuar mbi 1 miliard euro mbitërheqje (overdraft) nga llogaritë e tyre bankare, prej kur Qeverinë e udhëheqë kryeministri Albin Kurti, është dëshmi e frikshme e përkeqësimit të gjendjes ekonomike në vend”, ka shkruar Mustafa në facebook.
Ai më tej theksoi se për t’u përballur me shpenzimet e rritura të jetesës, në kushtet kur të hyrat nuk janë rritur, qytetarët po mbështeten në shfrytëzimin e këtij produkti kreditor bankar që vjen me një normë interesi prej mbi 20%.
“Qeveria aktuale, e akomoduar mirë në luksin e pushtetit, duket se ka harruar që rritja e çmimeve nga viti i kaluar ka vazhduar në vitin 2023 dhe po vazhdon në 2024”, tha Mustafa teksa shtoi se pasojat e inflacionit nuk i takojnë së kaluarës, por vazhdojnë të jenë prezente edhe sot.
Sipas tij, kjo qeveri po prodhon propagandë dhe vetëm propagandë – asnjë zgjidhje për problemet me të cilat po ballafaqohen qytetarët. /Kosovatimes/
