Regis Bomy thotë se të ardhurat që merren nga ky biznes janë shumë të pakta
Çdo mëngjes, Regis Bomy zgjohet herët në mëngjes për të kujdesur për 200 lopët që rrit së bashku me të birin në stallën e tyre në Mareuil-la-Motte, një orë e gjysmë në veri të Parisit.
Ai thotë se punon të paktën 70 orë në javë ndërsa shpjegon se profesionin e ka mësuar nga i ati.
“Punën e kam mësuar nga babai im. Në atë kohë, ne mësuam për këtë punë. Dhe sot, sigurisht, ne vazhdojmë të mësojmë se si ta bëjmë këtë punë, por unë nuk mund të punoj më siç më mësoi babai im.”
Djali i tij, fillimisht hezitoi përpara se të pranonte të merrej me këtë biznes.
61-vjeçari thotë se të ardhurat që ai merr nuk janë të mjaftueshme kur krahasohen me orët e shumta të punës dhe kostot që lidhen me drejtimin e fermës së tij.
“Djali im, ai nuk është më i motivuar si unë kur isha në moshën e tij, duke pasur parasysh të gjitha burokracitë që përballemi, dokumentet, kontrollet. Ai nuk e ka pasionin që kisha unë në moshën e tij. Nuk është më i njëjti vizion. Edhe shumë të rinj si im bir nuk kanë më të njëjtin vizion siç kishim ne në moshën e tyre, dhe kjo është turp sepse ne e humbasim gjithë këtë dashuri për bujqësinë.”
Fermeri 61-vjeçar ka marrë pjesë në protestat që janë zhvilluar në Francë të cilët kërkojnë paga më të mira, dhënien fund të rritjes së çmimit të karburantit dhe kompensim më të mirë në rast fatkeqësie natyrore.
Ndërkohë, teksa e ardhmja e fermës së Regis është e sigurt në duart e djalit të tij, dhjetëra mijëra fermerë të tjerë luftojnë për t’ia kaluar biznesin brezit të ri.
Gjysma e fermave franceze drejtohen nga të paktën një person i cili është 55 vjeç ose më shumë ndërsa vetëm 20% e fermerëve janë nën moshën 40 vjeç.
