Ambasadori amerikan në Kosovë, Jeff Hovenier, ka përuruar nyjat qendrore arsimore në kuadër të RIT Kosovës. Me këtë rast Hovenier, tha se do të mbështesin përmirësimin e cilësisë në arsim.
“Kjo nismë i ka dy qëllime kryesore. E para për të rritur bashkëpunimin ndëretnik përmes mundësive të përbashkëta të mësim-nxënies shkencore dhe për të pajisur kosovarët me shkathtësi që iu nevojiten për të shtyrë përpara zhvillimin ekonomik dhe demokratik të vendit. Nisma e shkollave dhe spitaleve amerikane jashtë vendit ASHA është program i kamotshëm I USAID-it që ndihmon zhvillimin e shkollave, bibliotekave dhe qendrave spitalore bashkëkohore nëpër botë. Kjo nismë pasqyron idealet amerikane të shkëlqyeshme dhe mundësitë arsimore dhe mund të nxisë bashkëpunim të mëtejshëm ndërmjet Shteteve të bashkuara të Amerikës dhe vendeve të tjera në fushën e arsimimit të lartë”, tha ai.
Drejtori i RIT Kosova, Kamal Shahrabi, theksoi se laboratorët do të hapen në tri faza.
“Janë tri faza që këto laboratorë do të hapen. Faza e sotme është faza e parë, është laboratori shkencor. Do ta shihni një lloj teknologjie të kohëve të fundit dhe nuk besoj që në asnjë nga spitalet apo qendrat mjekësore do ti shihni këto lloj laboratorësh. Do të shohim pajisjet të cilat do të ekspozohen te studentët, do te kemi mundësi të bëjmë matje dhe analiza e eksperimente të ndryshme duke i shfrytëzuar këto pajisje që të përmirësojmë ambientin ku jetojmë”, theksoi ai.
Ndërkaq, ministrja e Arsimit, Arbërie Nagavci tha se kjo është një nismë tejet e qëlluar derisa shtoi se është poashtu në vijë të plotë me politikat qeverisëse.
“Në linjë të drejtpërdrejtë me veprimet që kemi marrë si qeveri dhe vazhdojmë ti marrim që nga marrja e mandatit tonë. MASHT ka marrë hapa konkret në të dy këto aspekte dhe është e udhës të theksoj që qeveria jonë ka arritur ti kombinojë të dy këto elemente në procese të përbashkëta gjatë punës së saj. Kemi dhënë tashmë një shtysë të madhe përfshirjes së studenteve vajzave dhe grave në fusha Stamp duke ofruar mbështetje me bursa dhe paralelisht të njëjtin parim e kemi ndjekur edhe sa u përket studentëve nga grupet e margjinalizuara nga komunitetet dhe duke përkrahur më shumë ata që kanë nevojë më shumë”, tha ajo.
SHBA-ja ka ndarë 670 mijë dollar për pajisje laboratorikë për këtë institucion, në mënyrë që të studentet të mësojnë me standarde amerikane.
