Drejtori i përgjithshëm i Radiotelevizionit të Kosovës, Shkumbin Ahmetxhekaj, ka theksuar se reforma do të mundësojë që transmetuesi publik “të kthehet në binar”.
Ai ka potencuar nevojën e rritjes së buxhetit nga Kuvendi i Kosovës.
“Reforma që e kemi prezantuar në bord, parashikon që RTK mund të funksionojë me 10% staf më pak se sa që ka tani. Kemi të bëjmë me fuzionim të shumë departamenteve, në një lloj centralizimi. Po parashikojmë t’i ulim nivelet menaxhuese nga 126 në 76, për të rregulluar pozitat e redaktorëve, gazetarëve, që të jenë në proporcion të drejtë me standardet ndërkombëtare se si duhet të funksionojë një media”, ka thënë Ahmetxhekaj.
Po shqyrtohet programi i shpenzimeve të RTK-së
Komisioni për buxhet dhe financa është duke shqyrtuar programin e shpenzimeve të RTK-së për periudhën janar-qershor. Për 6 mujorin e parë të vitit, buxheti parashihet të jetë 4 milionë e 400 mijë euro.
Nënkryetarja e Bordit të RTK-së, Albulena Mehmeti ka thënë se planifikohet të shpenzohet 50% e buxhetit të plotë.
“Buxheti i RTK-së është i ndarë me shumën e njëjtë sikur vitin e kaluar. Pra këtë vit është 8 milionë e 960 mijë euro, e cila përbën 81.51% të buxhetit. 13.19% janë të hyra nga marketingu dhe rrjete sociale, konkretisht 1 milion e 450 mijë euro. 2.27% apo 250 mijë euro janë të ndara nga MKRS për Festivalin e Këngës, 3.2% janë fondi rezervë që barten nga viti në vit. Gjithsej RTK do të operojë në vitin 2024 me 10 milionë e 911 mijë e 861 euro”, ka deklaruar ajo.
Anëtarët e komisionit kanë pasur pyetje edhe për reformën e RTK-së, e cila synon ristrukturimin e institucionit për brenda. Mehmeti ka thënë se ende procesi është duke vazhduar dhe se duhet të bëhen disa ndryshime në draft.
“Me reformë i rregullojmë të gjithë punëtorët e sektoreve. Reforma parasheh specifikimin e departamenteve, sa punëtorë do të ketë në departamente. Organogrami i RTK-së është i ngarkuar, duke shkuar në eliminimin e pozitave, sepse ka pozita që paguhen shumë por s’kanë përshkrime të punës”, ka thënë ajo.
Tutje Mehmeti ka thënë se mosaprovimi i draftit fillestar ka ardhur për shkak se kalkulimi i pagave ka qenë i realizuar në mënyrë horizontale dhe s’ka qenë gjithëpërfshirës.
