Komisioni Qendror i Zgjedhjeve ka njoftuar se ende janë në proces të verifikimit të nënshkrimeve në peticionet për shkarkimin e kryetarëve në katër komunat veriore.
Zëdhënësi Valmir Elezi ka konfirmuar për RTKlive se procesi do të marrë kohë, për shkak se nënshkrimet janë mbledhur në format fizik.
“Pas përfundimit të verifikimit të nënshkrimeve të mbledhura, do të përgatisim raport për çdo komunë dhe do të njoftojmë ministrinë, kryesuesit e kuvendeve komunale, kryetarët e komunave dhe grupet nismëtare. Po ashtu, përgjigjja e KQZ-së do të bëhet publike edhe për qytetarët dhe mediat”, ka thënë ai në një përgjigje për RTKlive.
Komisioni Qendror i Zgjedhjeve kishte pranuar peticionet e nënshkruara nga qytetarët për shkarkimin e kryetarëve në Mitrovicë të Veriut, Zveçan, Leposaviq dhe Zubin Potok në fund të muajit janar.
