Ambasada e Mbretërisë së Bashkuar në Prishtinë ka shkruar se kanë ndarë përvojën e tyre për integritetin e sistemit gjyqësor me ministren e Drejtësisë, Albulena Haxhiu, e cila po qëndron në një vizitë zyrtare në këtë shtet.
“Ne ishim të kënaqur të mbështesim vizitën e ministres Haxhiu në Mbretërinë e Bashkuar dhe të ndajmë përvojën tonë në luftën kundër dhunës me bazë gjinore, në rehabilitimin dhe rintegrimin e shkelësve dhe në sigurimin e integritetit të sistemit gjyqësor. Një sektor i pavarur, transparent dhe i drejtë është themeli i një vendi demokratik”, ka shkruar Ambasada e Mbretërisë së Bashkuar.
Haxhiu ka takuar ministrin e Drejtësisë në Mbretërinë e Bashkuar, Alex Chalk. Ajo gjithashtu është takuar me kryetaren e Komisionit për Punë të Jashtme, Alicia Kearns, e cila njihet për mbështetjen e saj ndaj Kosovës. Me të Haxhiu ka folur për anëtarësimin e vendit në Këshillin e Evropës.
