Ministrja e Punëve të Jashtme dhe e Diasporës, Donika Gërvalla, ka kritikuar partitë opozitare që pikërisht në ditën kur do të ballafaqohen me presidentin e Serbisë, Aleksandër Vuçiq në Këshillin e Sigurimit të OKB-së, ata kanë zgjedhur që të diskutojnë mbi punën e kësaj ministrie. Ajo ka thënë se tashmë ka ‘vdekur periudha e pazareve dhe e emërimeve të ambasadorëve e konsujve nëpër kafene’.
Gërvalla ka thënë se është e gatshme të diskutojë me partitë opozitare në Kuvend dhe nuk i shmanget asnjë debati dhe asnjë hetimi, por ka thënë se mezi pret të diskutojë edhe për punën e kaluar të diplomacisë, ngase sipas saj qytetarët e meritojnë të dinë se nga kush e si janë përfaqësuar vite me radhë.
“Ndërkohë që së bashku me kryeministrin Kurti jemi nisur për Nju Jork, ku në Këshillin e Sigurimit të OKB-së do të ballafaqohemi me Aleksandar Vuçiçin dhe sulmet, gënjeshtrat, propagandën e tij ndaj Kosovës, qytetarëve dhe institucioneve të saj, opozita paska zgjedhur pikërisht ditën e sotme për të debatuar rreth Ministrisë së Punëve të Jashtme dhe Diasporës, duke refuzuar propozimin për shtyrje të kësaj pike të rendit të ditës deri në seancën e ardhshme. Meqenëse detyra ime ma kërkon që sot të jem në Nju Jork dhe nga pamundësia që të jem e pranishme në atë seancë të Kuvendit, dua të përcjell mesazhin që jo vetëm që nuk i shmangem asnjë debati dhe asnjë hetimi, por mezi po pres që të flasim edhe për keqmenaxhimin e parasë publike edhe për punësimet e jashtëligjshme, familjarizmin dhe shkeljet konstante të ligjit në këtë ministri. Mezi po pres”, ka shkruar Gërvalla në Facebook.
Ajo tutje ka thënë se Qeveria është duke kryer reformën më të thellë në këtë institucion të rëndësishëm të Republikës, duke vendosur në çdo segment si kriter të vetëm ligjin, profesionalizmin dhe meritokracinë dhe duke vënë në binarë të duhur kontrollin e financave dhe parasë publike si dhe llogaridhënien në çdo fushë.
Ajo ka përmendur se në të kaluarën, emërimet e diplomatëve janë bërë në telefona dhe oda.
“Ka vdekur koha e pazareve dhe emërimeve të ambasadorëve dhe konsujve nëpër kafene, telefonata të stilit pronto dhe në oda, të shpenzimeve marramendëse për udhëtime dhe hotele, të shitjes së pasaportave nëpër stacione trenash dhe pika karburanti, të sorollatjes me pasaporta dhe targa diplomatike dhe lloj-lloj malli nëpër ato vetura, të tonit harbut ndaj qytetarëve nëpër konsullata”, ka shtuar Gërvalla. /Kosovatimes/
