Inspektorati Policor i Kosovës ka realizuar sot një takim me qytetarët, duke shpalosur misionin dhe punën e këtij institucioni.
“Synimi i këtij aktiviteti me temën ‘Inspektorati Policor i Kosovës, roli dhe rëndësia në sundimin e ligjit në Kosovë’, përveç pjesës së fuqizimit të bashkëpunimit me qytetarë, ishte edhe i ngritjes së vizibilitetit të organizatës lidhur me fushë-veprimtarinë e IPK-së në përgjithësi, trajtimit të ankesave të qytetarëve, inspektimet e rregullta dhe të jashtëzakonshme”, thuhet në njoftimin e IPK-së.
Gjatë diskutimit të hapur me qytetarë nga komuniteti shqiptar dhe kroat, u dhanë shpjegimet për ecurinë e procedurës hetimore në rastet që trajton IPK në përputhje me Kodin e Procedurës Penale të Kosovës, inspektimet dhe roli i tyre në ngritjen e profesionalizmit të policisë dhe rëndësinë e integritetit policor.
Ky aktivitet është përcjellë me interesim nga qytetarët e Janjevës ku edhe janë parashtruar pyetje të cilave u kanë dhënë përgjigje zyrtarët e IPK-së dhe PK-së. /Kosovatimes/
