Këshilli i Sigurimit i OKB-së ka mbajtur një seancë të jashtëzakonshme për situatën në Kosovë, me kërkesë të Serbisë.Seanca erdhi pas vendimit të Bankës Qendrore të Kosovës që euro të jetë valuta e vetme për pagesat dhe transaksionet e pagesave, që në praktikë nënkupton heqjen e dinarit serb.Në seancë janë përballur presidenti i Serbisë , Aleksandar Vuçiq dhe kryeministri i Kosovës, Albin Kurti .
“Sulmet ndaj serbëve dhe popullatës tjetër joshqiptare vazhdojnë. Serbët varen drejtpërdrejt nga fondet e dinarëve që vijnë nga Republika e Serbisë. Kjo masë është në radhë të parë një sulm ndaj popullatës serbe”, tha Vuçiq.
Ai tha se në Kosovë janë kryer 669 sulme me motive etnike, që, thotë ai, është një rritje prej 300 për qind.
“Kosova është shoqëri multietnike”, tha Kurti, duke shtuar se është gënjeshtër që Kosova i persekuton serbët.
“Është e vështirë të dëgjosh dhe ka një ironi të thellë në akuzat e rreme për shkelje të të drejtave të njeriut nga një vend që kreu gjenocidin e fundit në shekullin e 20-të dhe një qeveri që është një nga kërcënimet më të mëdha autoritare për paqen dhe sigurinë rajonale .” ka thënë Kurti.
Ai tha se pikërisht për shkak të Serbisë, e cila kreu gjenocid në Srebrenicë dhe në Kosovë, OKB-ja themeloi Tribunalin në Hagë në vitet ’90.
“Brutaliteti që ata treguan ndryshoi ligjin ndërkombëtar përgjithmonë”, tha Kurti.
Ai po ashtu ka kujtuar se Vuçiq ka qenë ministër i Informimit në kohën e regjimit të Sllobodan Millosheviqit.
Kurti tha gjithashtu se euro është valuta e vetme në Kosovë dhe se “dinarët trajtohen njësoj si dollarët amerikanë, paundet britanike apo leku shqiptar”. Ai tha se problemi i Beogradit është se nuk mund të financojë më kriminelët dhe terroristët në Kosovë me shuma të mëdha parash.
