Misioni i OSBE-së në Kosovë ka publikuar raportin për ndikimin e dorëheqjes masive të vitit të gjyqtarëve, prokurorëve dhe personelit administrativ serb të Kosovës nga sistemi i drejtësisë në rajonin e Mitrovicës.
Sipas komunikatës së dërguar për media, këto dorëheqje janë cilësuar si “kthim i madh prapa për sistemin e drejtësisë në Mitrovicë”, teksa raporti analizon efikasitetin para dhe pas dorëheqjeve.
“Pas integrimit të stafit gjyqësor serbë të Kosovës më 2017, këto dorëheqje ishin kthim i madh prapa për sistemin e drejtësisë në Mitrovicë. Raporti i Misionit të OSBE-së në Kosovë thekson se kjo ka rezultuar në zvogëlim të kapacitetit të gjykatës dhe prokurorisë për ndarje të drejtësisë, gjë e cila ka minuar të drejtën në gjykim brenda një kohe të arsyeshme dhe ka dëmtuar qasjen në drejtësi”, ka thënë Michael Davenport, Shef i Misionit të OSBE-së në Kosovë.
Si pasojë e mungesës së papritur dhe të konsiderueshme të stafit, Gjykata Themelore dhe Prokuroria Themelore në Mitrovicë përjetuan një rënie të ndjeshme në shkallën e procedurave gjyqësore dhe zvogëlimit të ngarkesës së lëndëve (masë kjo për matjen e efikasitetit të gjykatës dhe prokurorisë) nga 75% në 59% në gjykata dhe nga 75% në 57% në prokurori.
Tutje, raporti thekson domosdoshmërinë e masave për adresimin e këtyre çështjeve dhe rivendosjen e funksionimit efikas dhe të paanshëm të sistemit të drejtësisë në Mitrovicë.
“Mbi të gjitha, është e domosdoshme të promovohet sistemi shumetnik i drejtësisë”, thuhet në komunikatë.
Në vitin 2022 dhanë dorëheqje 20 gjyqtarë, 10 prokurorë dhe 132 zyrtarë të tjerë administrativë nuk janë pjesë e sistemit të drejtësisë. Përveç kësaj, dorëheqje dhanë edhe katër gjyqtarë serbë të Kosovës nga Divizioni i Apelit në Gjykatën e Apelit në Mitrovicën Veriore.
