YIHR pas aksionit në mbrojtje të komunitetit LGBTQI+, nëpërmjet një letre publike drejtuar kryetarit të Kuvendit, Glauk Konjufca, ka kërkuar shkarkimin e deputeteve Duda Balje dhe Labinotë Demi Murtezi.
Ata kanë kërkuar lirimin e dy deputeteve nga pozitat aktuale që i kanë në Komisionin për të Drejta të Njeriut.
“Me këtë rast, kërkojmë shkarkimin e menjëhershëm të Duda Balje nga pozita e kryetares së Komisionit për të Drejta të Njeriut. Nuk mund të lejojmë që një person me qëndrime diskriminuese të drejtojë një institucion kaq të rëndësishëm për mbrojtjen e të drejtave themelore të njeriut në Kosovë. Njëherit, kërkojmë edhe shkarkimin e Labinotë Demi Murtezi nga ky komision për gjuhën e saj shpifëse dhe të urrejtjes ndaj personave LGBTIQ+”, thuhet në komunikatën e dërguar për media.
Sipas justifikimit të tyre, Duda Balje dhe Labinotë Demi Murtezi nuk mund të përfaqësojë objektivitetin dhe pavarësinë e një komisioni që ka për detyrë të mbrojë të drejtat e njeriut për të gjithë qytetarët e Kosovës pa dallim. /Kosovatimes/
