Lëvizja Vetëvendosje ka bërë të ditur se kryeministri Albin Kurti, që është edhe kryetar i Lëvizjes Vetëvendosje mori pjesë në një takim rajonal të partive simotra të Partisë së Socialistëve Evropiane (PSE).
Në njoftim bëhet e ditur se me ftesë të Fondacionit gjerman Friedrich Ebert (FES), kryetari i Lëvizjes, Albin Kurti, sot mori pjesë në takimin rajonal me udhëheqës të partive simotra të Partisë së Socialistëve Evropian (PES), që u mbajt në Selinë e Lidhjes Social Demokratike të Maqedonisë (LSDM), në kryeqytetin e Maqedonisë së Veriut, në Shkup.
“Çështje qendrore e diskutimeve ishte jetësimi i zgjerimit të Bashkimit Evropian marrë parasysh realitetet e reja gjeopolitike, avancimi i agjendës socialdemokratike në Ballkanin Perëndimor dhe mobilizimi kundër rrezikut prej frymës në rritje të ekstremit të djathtë në Evropë”, thuhet në njoftim.
LVV-ja thekson se të pranishëm në këtë takim, krahas kryeministrit Kurti dhe bashkë-drejtuesit të SPD gjermane, Lars Klingbeil ishin drejtues dhe përfaqësues të lartë të partive simotra nga Maqedonia e Veriut, Shqipëria, Bosnje dhe Hercegovina, dhe Mali i Zi.
Gjatë këtyre takimeve, kryeministrit Kurti ishte i shoqëruar nga drejtuesi i Sekretariatit për Marrëdhënie Ndërkombëtare të LV-së, njëherit ministri i Kulturës, Rinisë dhe Sportit, Hajrulla Çeku. /Kosovatimes/
