Ndeshja e shumëpritur e mbrëmjes së kaluar ishte ajo e mbajtur në San Francisko ku Golden Stejt i Stephen Curry mundi Finiks me një kosh të numrit 30 vetëm 0.7 sekonda nga fundi i takimit.
Warriors janë dukshëm në një moment të mirë pasi bëhet fjalë për fitoren e gjashtë në shtatë takimet e fundit. Kështu Golden Stejt rikuperon pozicione edhe në klasifikim duke i marrë vendin e dhjetë Utës, vend ky që i jep një mundësi për të qenë në zonën “play-in”.
Sa i përket duelit me Suns duhet thënë se ishte një ndeshje e luftuar fort jo vetëm për faktin se koshi vendimtar u realizua në fund, por se asnjëra prej dy skuadrave gjatë të gjithë takimit nuk mundi që të krijonte një avantazh më të madh se shtatë pikë.
Koshi i Devin Buker (më i miri nga Suns me 32 pikë) i realizuar vetëm 35 sekonda nga fundi dukej se ishte vendimtar, por në 3.3 sekondat e fundit Golden Stejti shfrytëzoi armën e vet më të fortë.
Skema e përgatitur i dha mundësi Stephen Curry që të merrte përsipër aksionin e fundit dhe numri 30 nuk gaboi duke kthyer në kosh një goditje prej 10 metrash. Me tri pikët e Curry, Warriors kaluan me një pikë Suns duke koleksionuar një fitore të madhe përballë një rivali që është ndërtuar për të fituar titullin kampion.
Rezultatet
Dallas Mavericks-Oklahoma City Thunder 146-111
L.A. Clippers-Detroit Pistons 112-106
Toronto Raptors-Cleveland Cavaliers 95-119
Brooklyn Nets-San Antonio Spurs 123-103
Washington Wizards-Philadelphia 76ers 113-119
Orlando Magic-Chicago Bulls 114-108 (kohë shtesë)
New York Knicks-Indiana Pacers 111-125
Charlotte Hornets-Memphis Grizzlies 115-106
Atlanta Hawks-Houston Rockets 122-113
Portland Trail Blazers-New Orleans Pelicans 84-93
Golden State Warriors-Phoenix Suns 113-112
