Ish-presidenti amerikan Donald Trump i ka kërkuar Gjykatës së Lartë të shtyjë çështjen e tij për ndërhyrje në zgjedhje.
Trump po kërkon të bllokojë një vendim të një gjykate më të ulët që hodhi poshtë pretendimin e tij për imunitet nga përgjegjësia për shkelje të supozuara të ligjit kur ishte president.
Avokatët e politikanit republikan paraqitën apelin urgjent në gjykatën më të lartë të vendit të hënën, vetëm katër ditë pasi gjyqtarët filluan të dëgjojnë një tjetër apel të Trump. Ajo sfidon vendimin e Gjykatës së Lartë të Kolorados për të hequr emrin e tij nga lista e kandidatëve në zgjedhjet e ardhshme presidenciale. Gjyqtarët e shtetit konsideruan si bazë për këtë përpjekjet e Trump për të sfiduar humbjen e tij në zgjedhjet e 2020. Paneli përmendi Kushtetutën e SHBA, e cila ndalon zyrtarët që janë përfshirë në “rebelim ose kryengritje” të mbajnë poste publike.
“Pa imunitet nga ndjekja penale, presidenca siç e njohim do të pushojë së ekzistuari”, theksojnë avokatët e Trump. Çfarë vendos Gjykata e Lartë dhe sa shpejt e bën këtë, mund të përcaktojë nëse kandidati presidencial i GOP do të përballet me gjyq në çështjen përpara zgjedhjeve të nëntorit.
Koha e rastit nuk është përcaktuar, por ekipi i prokurorit special Jack Smith këmbëngul që gjyqi të zhvillohet këtë vit, raporton Zëri i Amerikës .
Trump është përpjekur vazhdimisht ta shtyjë rastin. Nëse ai fiton zgjedhjet e ardhshme presidenciale, ai mund të përpiqet të përdorë pozicionin e tij si shef ekzekutiv për të urdhëruar prokurorin e ri të përgjithshëm të heqë çështjet federale kundër tij ose madje të kërkojë falje.
Donald Trump është kandidati i parë presidencial në historinë e SHBA-së që kandidon për post, pavarësisht faktit se hetimet dhe procedurat e shumta penale dhe civile janë duke vazhduar në gjykata. Ai përballet me 91 akuza në katër çështje penale, duke përfshirë heqjen e dokumenteve top-sekret nga Shtëpia e Bardhë pas largimit të tij, si dhe shkeljen e ligjeve gjatë përpjekjes për të sfiduar rezultatet e zgjedhjeve presidenciale, sipas të cilave fitoi rivali i tij Joe Biden.
Në fillim të këtij muaji, një gjykatë federale e apelit vendosi se Donald Trump nuk kualifikohet për imunitet.
