Inspektorati Policor i Kosovës ka bërë të ditur se ka arrestuar një polic, pasi i njëjti dyshohet për ngasje të veturës në gjendje të dehur.
Rasti ka të bëjë me aksidentin që është shkaktuar ndërmjet dy automjeteve civile në Novosellë të Pejës, ku ishte përfshirë edhe një zyrtar policor (jashtë detyrës zyrtare me veturë private).
“Hetuesit e Inspektoratit Policor të Kosovës kanë pranuar një informacion nga Policia e Kosovës dje në orët e mbrëmjes përmes Linjës së Kaltër (numri i telefonit pa pagesë 080003333) lidhur me një aksident trafiku më lëndime trupore në mes dy automjeteve civile ku ishte përfshirë edhe një zyrtar policor (jashtë detyrës zyrtare me veturë private). Hetuesit e IPK-së me të pranuar informacionin kanë filluar të ndërmarrin veprimet fillestare hetimore në koordinim me prokurorin kujdestar. Sipas hetimeve fillestare, aksidenti është raportuar të ketë ndodhur dje në fshatin Novosellë të Pejës (në afërsi të terminalit doganor)”, thuhet në njoftim.
Pas veprimeve hetimore dhe pas testit të alkoolit, me dyshimin se ka kryer veprën penale “Ngasja në gjendje të paaftë apo të dehur” nga IPK është arrestuar i dyshuari (zyrtar policor) ndaj të cilit prokurori ka lëshuar aktvendim për ndalim për 48 orë.
Sipas njoftimit të IPK-së, si pjesë e procedurës administrative hetimore zyrtari policor është suspenduar nga puna.
Tutje thuhet se veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente. /Kosovatimes/
