Japonia nga 25 marsi do t’i heq vizat për mbajtësit e pasaportave diplomatike dhe zyrtare në Kosovë. Kështu ka njoftuar kryeministri Albin Kurti duke e quajtur këtë, një moment historik të rëndësishëm në marrëdhëniet Kosovë–Japoni.
Këtë njoftim ai e dha në pritjen e organizuar nga ambasada e Japonisë, me rastin e ditëlindjes së perandorit Naruhito.
“Vizitat zyrtare qeveritare të vitit të kaluar e kanë forcuar më tej lidhjen tonë. I shprehim mirënjohjen e sinqertë Qeverisë japoneze për vendimin e saj për të hequr kërkesat për viza për mbajtësit e pasaportave diplomatike dhe zyrtare, duke filluar nga 25 marsi – një moment historik i rëndësishëm në marrëdhëniet tona dypalëshe”, ka deklaruar kryeministri Kurti.
Gjatë fjalimit, Kurti ka përmendur edhe ndihmën dhënë nga qeveria japoneze për refugjatët kosovarë gjatë viteve 1998-1999, duke shtuar se pret që Japonia të investojë në projekte të rëndësishme në Kosovë.
“Ne presim me padurim investime më të mëdha japoneze në projektet infrastrukturore të Kosovës, duke përfshirë teknologjitë e rinovueshme, qendrat e skijimit, hekurudhat dhe sektorët e tjerë jetik”, është shprehur Kurti.
Në këtë pritje ishte e pranishme edhe Presidentja e Kosovës Vjosa Osmani.
