Ministrja e Punëve të Jashtme dhe Diasporës e Republikës së Kosovës, Donika Gërvalla, në margjinat e Konferencës së Sigurisë në Munih ka takuar Ministrin e Punëve të Jashtme, Çështjeve Evropiane dhe Tregtisë së Maltës Ian Borg, me të cilin ka folur për bashkëpunim në ekonomi, shkëmbim tregtar, turizëm, shkëmbim të përvojave në qeverisje të mirë dhe proceset integruese të Kosovës.
Në njoftimin për media nga MPJD-ja, thuhet se gjatë takimit bilateral, Ministrja Gërvalla falënderoi homologun e saj për mbështetjen që Malta i ka dhënë Kosovës duke theksuar se shteti ynë po ecën me hapa të sigurt drejt përparimit thelbësor në përmbushjen e kritereve për anëtarësim në BE dhe NATO.
Gërvalla tha se për përmbushjen e kritereve për anëtarësim në BE dhe NATO, Kosova ka ndërmarrë reforma të thella në ekonomi, politika zhvillimore, legjislacion, luftë kundër korrupsionit dhe progres të përgjithshëm shoqëror.
“Marrë parasysh që Malta këtë vit kryeson OSBE-në, Ministrja Gërvalla dhe Ministri Borg diskutuan edhe për bashkëpunimin në fushat që mbulon ky mekanizëm i rëndësishëm ndërkombëtar”, thuhet në njoftim. /Kosovatimes/
