Kryetari i AAK-së, Ramush Haradinaj bashkë me deputetë e anëtarë te partisë është pritur nga Rifat Jashari, vëllai i komandantit legjendar Adem Jashari, në Kullën e Familjes Jashari në Prekaz.
Bashkë me Haradinajn i pranishëm ishte edhe kryetari i NISMA-s, Fatmir Limaj, i cili tashmë është në një koalicion bashkë me AAK-në.
Haradinaj e Limaj, bashkë me delegacionin ka bërë homazhe në Kompleksin Memorial “Adem Jashari”. Kjo vizitë po bëhet në prag të 17 shkurtit, Ditës së Pavarësisë së Kosovës.
Pas homazheve në kompleksin memorial “Adem Jashari”, së bashku me kryetarin e Nisma Socialdemokrate, Fatmir Limaj, kreu i AAK-së, tha se në këtë vend ka ndodhur kthesa më e shqiptarëve.
“Jemi aty ka ndodhi kthese jonë, kthesa historike e lirisë sonë, kthesa e shqiptarëve në Prekazin legjendar me komandantin legjendar Adem Jashari, familja Jashari edhe krenaria jonë. Jam i nderuar që nderojmë te varret e heronjve, po ashtu edhe që ia uruam Pavarësinë të parit bacit Rifat”, ka theksuar Haradinaj.
Haradinaj është shprehur se sakrifica e familjes Jashari, shërbeu si shembulli më frymëzues i guximit për të luftuar për liri.
“Liria e shteti ynë i ka rrënjët pikërisht aty ku kulmuan ato përpjekje të parreshtura, në Prekazin legjendar. Në prag të 16-vjetorit të Pavarësisë së Kosovës, kujtojmë e nderojmë gjithë anëtarët e kësaj familje, që shërbeu si shembulli më frymëzues i guximit për të luftuar për çlirimin dhe pavarësinë e Kosovës. Në këtë ditë të veçantë, vazhdojmë të përforcojmë më shumë se kurrë përkushtimin tonë ndaj vlerave të lirisë, për të cilën familja Jashari dhe shumë të tjerë janë sakrifikuar. Duhet të angazhohemi parreshtur në forcimin e shtetësisë sonë duke qenë në rresht me aleatët tanë në krye me ShBA, si anëtare e NATO-s”, ka deklaruar Haradinaj.
Kryetari i Nisma Socialdemokrate, Fatmir Limaj, ka thënë se në Prekaz janë themelet e demokracisë dhe pavarësisë së Kosovës.
“Urime të gjithë qytetarëve të Kosovës, këto janë themelet e demokracisë dhe pavarësisë së Kosovës. Ky përvjetor është rast i mirë për të gjithë ne për të uruar dhe kujtuar sakrificën”. Është mirë sot për t’i parë fëmijët e Kosovës si shtetas”,ka deklaruar Limaj.
