Ministri i Financave, Punës dhe Transfereve Hekuran Murati ka takuar Martin Vickers, Deputet në Parlamentin e Mbretërisë së Bashkuar si dhe i Dërguar i Veçantë për Tregtinë në Ballkanin Perëndimor, të cilin e ka njoftuar për mundësitë e të investuarit në Kosovë duke vënë theks tek prioritetet aktuale të Qeverisë siç janë investimet në sektorin e energjisë, infrastrukturës dhe sigurisë.
Në njoftimin për media nga Ministria e Financave, thuhet se ministri Murati përmendi edhe potencialin për investime në fushën e prodhimit në Kosovë si dhe lirinë e lëvizjes si katalizator për rritjen e bashkëpunimit tregtar midis dy vendeve.
Nga ana e tjetër Martin Vickers, përmendi disa nga prioritetet e qeverisë britanike dhe shprehu gatishmërinë për të thelluar bashkëpunimin në sektorët e energjisë, mjedisit si dhe ndarjen e njohurive nga organizimi i Lojërave Olimpike, tash që Kosova është përzgjedhur si vend nikoqir për Lojërat Mesdhetare 2030.
“Të dyja palët theksuan miqësinë shumëvjeçare të Kosovës me Mbretërinë e Bashkuar dhe vazhduan diskutimin e tyre duke eksploruar mundësitë për bashkëpunim në projekte të tjera në të ardhmen”, thuhet në njoftim. /Kosovatimes/
