Ministri i Shëndetësisë, Arben Vitia, ka vizituar shkollën e mesme të ulët, “Hyzriu e Samiu”, në fshatin Letanc të Podujevës, ku ka filluar vaksinimi kundër papilloma virusit human (HPV) që parandalon kancerin në qafën e mitrës.
Ministri Vitia ka theksuar se vaksinimi i vajzave të klasave të gjashta me vaksinën HPV, parandalon kancerin e qafës së mitrës.
“Unë morra vesh që dje ka filluar në Komunën e Podujevës dje përmbi 80 për qind e vajzave e klasave të gjashta në vendin ku është bërë vaksinimi e kanë marr këtë vaksinë që është jashtëzakonisht lajmë i mirë dhe përfund apeloj të gjithë prindërit pa përjashtim t’i stimulojnë vajzat ta marrin këtë vaksinë”, ka thënë Vitia.
Ministri Vitia ka deklaruar se kjo vaksinë nuk ka efekte anësore.
“Aspak efekte anësore nuk ka, e cila që nuk trajton po parandalon një sëmundje shumë të rrezikshme siç është kanceri i qafës së mitrës. Ministria e Shëndetësisë ka investuar dikun 5 milionë euro më shumë për këtë vit, jo vetëm për këtë vaksinë por edhe për dy vaksina të tjera dhe do të vazhdojë të investoj edhe më shumë në parandalim, natyrisht siç kemi investuar dhe po investojmë në Kliniken e Onkologjisë”, ka thënë Vitia.
Kurse, drejtori i Institutit Kombëtar të Shëndetësisë Publike të Kosovës, Naser Ramadani, ka thënë se hulumtimet në botë kanë paraparë që kjo moshë është idealja për të parandaluar kancerin në qafën e mitrës dhe se për këtë nuk duhet të ketë hezitim.
Edhe kryetar i Podujevës, Shpejtim Bulliqi ka apeluar për vaksinim për këtë grupmoshë.
