Policia e Kosovës ka arrestuar një trafikant të narkotikëve dhe ka konfiskuar mbi 33kilogram marihuanë.
Policia e Kosovës në njoftimin për media thotë se Sektori i Hetimeve nga Departamenti për Kufi gjatë realizimit të një plani operativ, në bjeshkët e fshatit Vermicë ka vërejtur dy persona të dyshuar duke hyrë nga territori i Republikës së Shqipërisë në territorin e Republikës së Kosovës përmes rrugëve malore në mënyrë të paligjshme.
“Personat e lartcekur janë vërejtur se gjatë lëvizjes, në shpinë bartnin ngarkesa të dyshuara, ku pasi të njëjtit kishin hyrë në zonën e Republikës së Kosovës, nga zyrtarët policor janë urdhëruar që të ndalohen, mirëpo të njëjtit kanë lëshuar ngarkesat që bartnin dhe kanë filluar që të ikin, njëri nga ta është arritur të ndalohet nga ana e zyrtarëve policorë”, thuhet në njoftimin e policisë.
Tutje thuhet se ngarkesa e dyshuar ndodhej në dy çanta me 11 paketime në sasi prej 33.800 kg substancë e dyshuar narkotike e llojit marihuanë.
“Lidhur me rastin është konsultuar prokurori kompetent dhe rasti i kompletuar së bashku me substancën e dyshuar i dorëzohet Drejtorisë për Hetimin e Trafikimit me Narkotik Prizren për trajtim të mëtutjeshëm”, thuhet në njoftimin e policisë. /Kosovatimes/
